0

Ályktun: Áskorun til stjórnvalda

By 12. February, 2019 Ályktanir
Framkvæmdastjórn Ungra vinstri grænna í samstarfi við Unga jafnaðarmenn, Unga pírata, Uppreisn og unga meðlimi Sósíalistaflokksins skrifa:

Undirritaðar ungliðahreyfingar skora á íslensk stjórnvöld að þrýsta á Mike Pompeo, utanríkisráðherra Bandaríkjanna að beita sér fyrir því að mannréttindabrot gegn börnum á landamærum þarlendis verði stöðvuð. Ráðherrann er væntanlegur til Íslands föstudaginn n.k. og munu Guðlaugur Þór Þórðarson, utanríkisráðherra og Katrín Jakobsdóttir, forsætisráðherra funda með honum. Nauðsynlegt er að ríkisstjórn Íslands fordæmi aðgerðir bandarískra stjórnvalda en sé ekki aðgerðarlaus áhorfandi í slíkum alvarlegum brotum. 

Ekkert barn á að þurfa að alast upp í varðhaldi og engu barni, né fjölskyldu þess, skal refsað fyrir að leita öryggis. Það er ekkert pólitískt við það að bjarga lífi barna og það er mikilvægt að hafa í huga að fólk sem er á flótta, til að halda lífi, hefur rétt á réttlátri yfirheyrslu, réttarhaldi og mannúðlegri málsmeðferð.

Samkvæmt barnasáttmála Sameinuðu þjóðanna ber ríkjum að gera það sem barni er fyrir bestu þegar kemur að ákvörðunum er snerta börn. Stefna Bandaríkjanna brýtur á ákvæðum sáttmálans og vinnur gegn tilgangi hans. Bandaríkin eru ekki að aðskilja foreldra og börn með þeirra hagsmuni að leiðarljósi heldur sem fyrirbyggjandi refsingu gegn óskráðri komu foreldra þeirra inn í landið. Stefnan mun hafa skelfilegar afleiðingar fyrir börnin og foreldra þeirra.