Jafnrétti og valfrelsi í námi

Ung vinstri græn líta á gjaldfrjálsa menntun sem jafnréttis- og mannréttindamál. Menntun á að vera mannréttindi, ekki forréttindi. Til þess að svo megi verða er nauðsynlegt að hver einstaklingur geti stundað það nám sem hæfileikar, geta og áhugi segja til um óháð efnahag, öllum félagslegum þáttum eða stöðu að öðru leyti. Þess vegna hafna Ung vinstri græn einkavæðingu í menntakerfinu.

Ung vinstri græn leggja áherslu á sjálfbærni, jafnrétti og lýðræði í skólastarfi og vilja aukið og virkt gæðamat í menntamálum. Gera þarf ítrustu kröfur, byggðar á alþjóðlegum samanburði, til háskólanna í landinu og framkvæma reglulega gæðamat á þeim. Uppfylli einhver háskóli ekki þær kröfur sem gerðar eru til hans skal honum veittur ákveðinn frestur til þess að bæta úr því eða sæta ella viðurlögum. Ung vinstri græn telja núverandi fyrirkomulag samræmdra prófa koma niður á frumkvæði og fjölbreytni í skólum og hafa of stýrandi áhrif á skólastarf og vilja því afnema samræmd próf í núverandi mynd. Ung vinstri græn hafna styttingu náms til stúdentsprófs sem felst í skerðingu náms eða valkosta.

Ung vinstri græn gera kröfu um jafnan rétt til náms, hvort sem um er að ræða leikskóla, grunnskóla, framhaldsskóla, iðnskóla, háskóla, tónlistar- eða tómstundanám. Ung vinstri græn hafna því alfarið hugmyndum um skólagjöld á hvaða skólastigi sem er. Menntun á ekki að vera bundin við tiltekið aldursskeið frekar en tiltekna þjóðfélagshópa, og því er brýnt að efla endurmenntun og símenntun. Búseta á ekki að þurfa að standa í vegi fyrir menntun heldur á að leita leiða til að gera öllum kleift að stunda nám, hvar sem fólk er búsett. Brýnt er að nýta þá þekkingu og menntun sem nýjir Íslendingar koma með hingað til lands. Því er nauðsynlegt að auka tækifæri einstaklinga til að fá nám sitt metið að verðleikum hér á landi. Ung vinstri græn vilja auka valfrelsi í námi, og leggja áherslu á fjölbreytni í skólastarfi.

Ung vinstri græn vilja að innan opinbera skólakerfisins ríki faglegt frelsi til þess að fagfólk hafi svigrúm til að móta skólastarfið á skapandi og fjölbreyttan hátt. Brýnt er að styrkja framhaldsnám og rannsóknir, sem og endurmenntun kennara. Ung vinstri græn vilja styrkja kennaramenntun á Íslandi og vilja miða við að hún sé sambærileg miðað við það sem gengur og gerist í nágrannalöndum og þeim löndum sem hafa náð sérstökum árangri á sviði menntamála. Ung vinstri græn vilja að kjör kennara á öllum skólastigum séu góð, og í samræmi við þau mikilvægu störf sem kennarar gegna og þá ábyrgð sem þeir bera á uppeldi og menntun barna.

Ung vinstri græn leggja til eftirfarandi leiðir til að stuðla að jafnrétti, sjálfbærni og lýðræði í menntakerfinu:

Menntun óháð efnahag

• Að grunnskólar sjái nemendum sínum fyrir að minnsta kosti einni heitri máltíð á dag þeim að kostnaðarlausu.

• Að nemendur framhaldsskóla og iðnnemar fái styrki til bóka- og efniskaupa.

• Að námslán verði hækkuð þannig að námsmenn geti í raun og veru framfleytt sér með þeim.

• Að börn og ungmenni um allt land geti í auknum mæli fengið styrki til tómstundarstarfs. Þetta er ekki síst mikilvægt fyrir aðlögun ungra innflytjenda.

Menntun fyrir alla landsmenn

• Að réttur allra til náms óháð búsetu sé tryggður.

• Að stutt sé við uppbyggingu fræðasetra og námsvera um land allt svo allir landsmenn hafi möguleika á að stunda fjarnám á framhalds- og háskólastigi.

• Að rekstrargrundvöllur símenntunarstöðva landsbyggðarinnar sé tryggður.

• Að sérstök rækt sé lögð við menntun innflytjenda og barna þeirra og þeim tryggð góð íslenskukennsla.

• Að innflytjendabörnum sé tryggð kennsla í eigin móðurmáli og stutt við erlenda foreldra í að viðhalda móðurmáli barna sinna.

• Að sem flestum innflytjendum sé gert kleift að útskrifast með stúdentspróf með eigið móðurmál sem fyrsta mál.

Lýðræði og sanngirni í skólastarfi

• Að lýðræðisleg þátttaka nemenda í skólastarfi sé tryggð, þeir aldir upp í lýðræðislegum vinnubrögðum og upplýstir um réttindi sín og skyldur.

• Að nemendur framhalds- og háskóla njóti réttinda til jafns við einstaklinga á atvinnumarkaði, þar með talið réttinda til veikindadaga, hádegisverðarhlés og annarra almennra réttinda.

• Að brottfall í framhaldsskólum sé lágmarkað með því að því að bjóða uppá fjölbreyttar mislangar námsleiðir og standa vörð um félagslegt umhverfi í skólasamfélaginu.

• Að boðoð verði upp á viðunandi námsaðstöðu fyrir nemendur með sérþarfir.

• Að kjör leikskóla- og grunnskólakennara verði bætt.

Fjölbreytni í skólastarfi

• Að nemendur geti hafið framhaldsskólanám á mismunandi aldri og lokið því á mislöngum tíma.

• Að opnað verði fyrir frekari möguleika á samstarfi við erlenda skóla og möguleikar á nemendaskiptum verði auknir.

• Að aðalnámsskrá verði endurskoðuð með það að markmiði að einfalda hana og auka faglegt svigrúm innan skólakerfisins.

• Að fræðsla um fjölmenningu verði aukin á öllum skólastigum.

• Að þörfum nemenda sé mætt í samræmi við þarfir og þroska hvers og eins og tryggt að allir nemendur eigi jafna möguleika á að stunda nám þar sem hæfileikar þeirra njóta sín best.