Aukin lífsgæði með bættum loftgæðum
Það er ekki að tilefnislausu að svifryk og mengun ber æ oftar á góma þegar borgarmálin eru rædd. Mengun og svifryk er sívaxandi vandamál sem nauðsynlegt er að taka á. Sjálf bý ég í miklu návígi við umferðarþyngstu gatnamót landsins, gatnamót Kringlumýrarbrautar og Miklubrautar. Svifryk og mengun er skiljanlega ofarlega í huga þeirra sem búa í miklu návígi við umferðarþungar götur. Aukin mengun af völdum svifryks er hinsvegar ekki einungis vandamál þeirra sem búa nálægt umferðarþungum götum, aukin mengun er sameiginlegur vandi allra borgarbúa. Það að minnka mengun af völdum svifryks er því sameiginlegt viðfangsefni allra borgarbúa. Miklar umræður fóru af stað í Háaleitishverfi vegna fyrirhugaðra mislægra gatnamóta Kringlumýrarbrautar og Miklubrautar fyrir nokkrum árum. Íbúafundir voru haldnir og glærur settar fram sem sýndu mikil umferðarmannvirki.
Helmingur borgarlandsins undir umferðarmannvirki
Nú þegar er um helmingur borgarlandsins lagður undir umferðarmannvirki. Ég tók sem íbúi í Álftamýri virkan þátt í umræðu um mislæg gatnamót, mætti á kynningar- og íbúafundi og skrifaði greinar. Mér eins og fleiri íbúum nálægt fyrirhuguðum framkvæmdum hugnaðist illa þær „lausnir“ sem þar voru kynntar. Þær fólust allar í að greiða fyrir umferð bíla á kostnað gangandi og hjólandi umferð innan hverfis. Háaleitishverfi býr við það að vera „sundurskorið“ af stórum umferðargötum. Þó svo að flestir sem ferðast í gegnum Háaleitishverfi geri það til þess að komast í vinnu eða skóla, þá má ekki gleyma að fólk býr í námunda við umferðarþungar götur. Í Háaleitishverfi eru mörg fjölbýlishús og þar búa margar barnafjölskyldur. Í hverfinu eru leik-og grunnskólar auk íþróttamannvirkja. Heilsa íbúa við umferðarþungar götur hlýtur að vera vega þyngra en að greiða fyrir umferð einkabíla. Fram kemur á vefsíðu Norðurlandaráðs að svifryksmengun sé mannskæðari en umferðarslys á Norðurlöndunum. Við þurfum að minnka svifryksmengun í Reykjavík. Til þess eru margvíslegar aðferðir en sú áhrifamesta er að draga úr umferð einkabíla og greiða fyrir umferð strætisvagna, hjólreiða og gangandi vegfarenda. Einungis 4% ferða innan borgarinnar eru með strætisvögnum. Þetta hlutfall hefur lækkað síðustu ár í takt við aukna bílaeign, útþenslu borgarlandsins og skertri þjónustu strætisvagna.
Við berum ábyrgð á borginni okkar
Mikilvægt er að „lausnir“ á þeim vanda sem mengun af völdum svifryks er, verði unnar í samráði og samvinnu við íbúanna. Við hljótum öll að vilja búa í betri borg, ekki bara við sem búum við umferðaþungar götur. Það þarf að líta á alla borgina sem eina heild og öll berum við ábyrgð á að hér skapist umhverfi sem ekki er skaðlegt þeim sem þar búa. Það getur ekki verið þess virði að komast korteri fyrr á leiðarenda ef það hefur skaðleg áhrif á heilsufar íbúa við stórar umferðargötur. Í „Grænum skrefum“ sem samþykkt voru af borgarstjórn Reykjavíkur fyrir árið 2009 er talað um „Betra loft fyrir alla“. Það hlýtur að þýða að skipuleggja þurfi umferðarmannvirki í Reykjavík þannig að þau bæti loftgæði allra íbúa. Saman hljótum við að geta dregið úr svifryki og þeirri mengun sem því fylgir með bættan hag allra borgarbúa að leiðarljósi.
Elín Sigurðardóttir
Höfundur býr í Álftamýri og skipar 4. sæti á lista VG fyrir komandi borgarstjórnarkosningar
Greinin birtist í Hverfisblaði Laugardals, Háaleitis og Bústaða 21. apríl