Ungt fólk og sveitarstjórnarmál
Ég hef haft það á tilfinningunni síðustu misseri að ungt fólk hafi þá mynd af sveitarstjórnarmálum að þau séu „leiðinleg‟ og skipti það ekki máli. Þetta gæti tengst þeirri umræðu í samfélaginu að sveitarstjórnarmál séu á einhvern hátt „óæðri‟ heldur en landsmálin. Undir þessa skoðun er kynt þar sem margir stjórnmálamenn virðast líta á þátttöku í sveitarstjórnarmálum sem „stökkpall‟ inn á þing. Fjölmiðlar taka þátt í þessu og eru fljótir að spyrja fólk sem lætur til sín taka í sveitarstjórnum um hvort og hvenær það ætli inn á þing.
Ég er ekki sammála þessu viðhorfi. Sveitarstjórnarstigið er gífurlega mikilvægt og mikilvægi þess eykst stöðugt. Nú þegar hafa málefni grunnskóla verið flutt frá ríki til sveitarfélaga og til stendur að flytja fleiri stóra málaflokka s.s málefni fatlaðra og aldraðra. Í Borgarstjórn Reykjavíkur eru sífellt teknar ákvarðanir sem hafa áhrif á daglegt líf borgarbúa. Hægt er að auka þátttöku íbúa í ákvarðanatöku sem varðar þeirra nærsamfélag. Hverfaráð eru nú starfandi í öllum hverfum borgarinnar og eru þau skipuð íbúum hverfisins. Hverfaráðin voru efld talsvert í tíð 100 daga meirihlutans en þau má efla og styrkja enn frekar. Einnig felst tækifæri í því að veita nærþjónustu til íbúa á einum stað. Þannig gætu þjónustumiðstöðvar borgarinnar veitt þjónustu bæði frá ríki og borg.
Ég tel mikilvægt að þeir kjörnu fulltrúar sem starfa í borgarstjórn Reykjavíkur haldi á lofti því mikilvæga starfi sem þar fer fram og hefur áhrif á daglegt líf allra borgarbúa. Leitast má við að upplýsa ungt fólk betur um hvaða ákvarðanir eru teknar í borgarstjórn og hvernig þær hafa áhrif á líf þeirra sem Reykvíkinga. Ungt fólk á fullt erindi í sveitarstjórnarmálin, það er á hreinu!
Elín Sigurðardóttir
höfundur situr í stjórn Ungra vinstri grænna og gefur kost á sér í 3.-4. sæti í forvali Vinstri grænna í Reykjavík þann 6. febrúar nk.