16.4.2008 Auður Lilja Erlingsdóttir

Vígvæðing með einkaþotu

Í gær fór fram síðasta umræða um svokölluð varnarmálalög sem Ingibjörg Sólrún Gísladóttir utanríkisráðherra kynnti til sögunnar í vetur með sérstöku frumvarpi. Hún hefur kallað þessi nýju lög tímamót og eru það orð að sönnu: Lögin marka tímamót því með þeim er tekin meiri og virkari þátt í hernaðarbrölti og ógeðfelldum verkefnum hernaðarbandalagsins NATO, svo sem stríðið sem nú geysar í Afganistan. Það var táknrænt fyrir sóunina og firringuna sem fylgir þessari nýju vígvæðingarstefnu utanríkisráðherra að Ingibjörg og Geir skyldu fara með einkaþotu á NATO-fundinn í Búkarest þar sem bandalagið hvatti aðildarríkin til að eyða meiri peningum í stríð og vígbúnað.

Hervæðing á forsendum NATO

Við í Ungum Vinstri-grænum höfum gert okkar besta til að sporna gegn þessari nýju hervæðingu í varnarmálalögunum. Við höfum haldið fundi, skrifað margar greinar og gefið út sérstakan bækling þar sem við vöruðum við lögunum og breyttri stefnu Íslands gagnvart NATO. Eitt af því sem við bentum á var að með frumvarpinu er það í fyrsta sinn sett í lög að á Íslandi skuli fara fram heræfingar og að þær skuli vera á kostnað íslensku þjóðarinnar – þeirri sömu íslensku þjóð og á að heita herlaus og friðsöm. Annað atriði er að nú er í lögum kveðið á um fulla þátttöku Íslands í hernaðarstarfinu í NATO, meðal annars með því að Íslendingar sitji fundi í herstjórnarmiðstöðvum bandalagsins. Með því er brotið blað í utanríkissögu Íslands því jafnvel þegar háværustu deilurnar voru uppi um NATO-aðildina, þá voru alltaf gerðir skýrir fyrirvarar við þátttökuna í hernaðarlegu samstarfi á vegum NATO.

1500 milljóna sóun

Annað atriði sem við bentum á var sú mikla sóun fjármuna sem þetta frumvarp kynnir til sögunnar. Stofna á sérstaka „Varnarmálastofnun“ sem gleypir um 1500 milljónir króna á hverju ári. Fyrir þá upphæð mætti til dæmis fjölga leikskólaplássum um eittþúsund og fimmhundruð eða byggja nokkra nýja framhaldsskóla á landsbyggðinni. Það mætti líka nýta þessa peninga alla í að styrkja almenna löggæslu, almannavarnir og tollgæslu – 1500 milljónir gætu auðveldlega leyst fjárhagsvanda lögreglunnar á Suðurnesjum fimmfalt. Ef mönnum er alvara með þau orð sín að varnarmálalögin eigi að tryggja öryggi íslenskra borgara þá er hægur leikur að nota peningana þar sem þörfin er mest en ekki í tilgangslausa stríðsleiki og hernaðarbrölt á íslenskri grund. Staðreyndin er nefnilega sú að varnarmálalögin snúast ekki um varnir okkar heldur virkari þátttöku í NATO-starfi, og útgjöldin sem nú eiga að renna til varnarmála eru renna beint eða óbeint til hernaðarbandalagsins NATO og þátttöku okkar í því.

Árásarbandalagið NATO

Við höfum líka reynt að draga upp dálítið aðra mynd af NATO en það sem utanríkis- og forsætisráðherra – þotuliðið – kyrjar nú í hverjum fréttatíma, að NATO sé „varnarbandalag“ eða „öryggisbandalag“. Staðreyndin er sú að helstu verkefni NATO í gegnum söguna eru loftárásirnar á Júgóslavíu og stríðið í Afganistan. Hvort tveggja eru árásarstríð gegn þjóðum utan bandalagsins en snúast ekki um varnir aðildarríkjanna eða öryggi borgaranna þar. Með þessu frumvarpi, og nýrri stefnu utanríkisráðherra í málefnum NATO – það sem hún kallar „virka utanríkisstefnu“ – er verið að taka meiri þátt í þessu ógeðfellda bandalagi og öllum þeim styrjöldum sem því fylgja. Í því felst fyrirvaralaus stuðningur við þá hernaðarhyggju sem Samfylkingin talaði gegn fyrir kosningar og lofaði kjósendum sínum að breyta ef hún kæmist til valda.

Senda grein