Krónan er ekki dauð
Sú skoðun að íslenska krónan sé úrelt og ónýt verður sífellt víðteknari í þjóðfélaginu. Sífellt fleiri stórfyrirtæki og bankar hafa tekið upp eða hyggjast taka upp evru hennar í stað. Örfá fyrirtæki hafa tekið upp bandaríska dollara. Eins og flestir vita er verðbólga á Íslandi er nú 7% og stýrivextir 14,25% en sagan sýnir okkar að þeir hafa frekar takmörkuð áhrif á þróun verðbólgunnar. Viðskiptahallinn mælist nú 20% af vergri landsframleiðslu.
Krónan er jafnan úthrópuð sem sökudólgur fyrir öllum efnahagslegum vanda á Íslandi, þar af leiðandi er litið á evruna sem bjargvætti íslensks efnahagslífs og skyndilausn. Sannleikurinn er sá að krónan hefur fátt til saka unnið og á áfellisdóm ráðamanna og fjölmiðla ekki skilið. Gengi krónunnar hefur vissulega verið sveiflukennt lengi en þó ekki eins sveiflukennt eins og t.d. matarverð hér á landi.
Það ójafnvægi sem ríkir í íslensku efnahagslífi stafar af þenslu í hagkerfinu og á vinnumarkaði. Má þar nefna dýrar ríkisframfræmdir á borð við Kárahnjúkavirkjun og Tónlistarhöllina sem og auknar heimildir til húsnæðislána. Slíkt magn peninga í umferð leiðir óhjákvæmilega til verðbólgu.
Íslenskt hagkerfi er í reynd afar smátt en það er sterkt: matsfyrirtækið Moody's Investor Service staðfesti fyrir mánuði síðan lánshæfismat ríkissjóðs, gaf honum góðar einkunnir og sagði horfur stöðugar. Sökum hás vaxtastigs hérlendis og batnandi horfa í efnahagslífinu er íslenska krónan talin besti fjárfestingarkostur sem gjaldeyriskaupmenn hafa völ á næsta ári af greiningarfyrirtækinu TD Securities. Sérfræðingur sagði nýlega í samtali við vefútgáfu Bloombergs að sennilega hafi efnahagslægð verið forðað frá landinu á árinu 2007 og svo virðist sem efnahagslífið verði öflugt og blómlegt árið 2008.
Aðild að Evrópusambandinu er forsenda þess að ríki geti tekið upp evru. Slík aðild þjónar ekki hagsmunum Íslendinga eins og er og mörg rök vega þungt gegn aðild að sambandinu og enn fremur gegn myntbandalaginu. Með upptöku evru mundi verðlag snarhækka og smákaupmenn mundu sennilega nýta sér breytt verðskyn fólks líkt og gerst hefur í Þýskalandi og fleiri löndum sem hafa tekið upp evruna í seinni tíð. Þar að auki yrði möguleika stjórnvalda á sjálfstæðri efnahagsstjórn og fullveldi landsins fórnað. Sveiflurnar í íslensku hagkerfi eiga sér oft aðrar rætur og gerast á öðrum tíma en sveiflurnar í evrópska hagkerfinu.
Þar af leiðandi er ofurmikilvægt að Íslendingar haldi efnahagslegu sjálfstæði sínu. Með aðild að Evrópusambandinu færi efnahagslegt sjálfstæði þjóðarinnar sem og annað sjálfstæði forgörðum og það ekki fýsilegur kostur. Þótt krónan sé veik núna, getur hún tekið við sér og þjónað hagsmunum þjóðarinnar enn betur en evran. Krónan er ekki dauð.