Kærkomin breyting í menntamálum
Undanfarin misseri hafa breytingar í menntakerfinu verið tíðræddar. Hvort sem um er að ræða samræmd stúdentspróf, styttingu náms til stúdentsprófs, gjaldtöku í háskóla eða annað skylt, eiga þau mál lítið upp á pallborðið hjá íslenskum námsmönnum.
Gildi starfsnáms hefur lengi verið ábótavant og það oft minna metið en bóknám. Námið er erfitt í skipulagningu, uppfært of sjaldan miðað við tækniþróun og tengsl þess við önnur skólastig eru lítil. Skipuð var svokölluð starfsnámsnefnd af menntamálaráðherra snemma árs, sem átti að fjalla um endurskoðun starfsnáms. Nefndin skilaði áliti sínu í síðasta mánuði.
Hún leggur til ?veigamiklar breytingar á skipulagi framhaldsskólans í heild? (skýrsla starfsnámsnefndar). Þær fela meðal annars í sér afnám aðgreiningar starfsnáms og bóknáms í framhaldsskólum, umfangsminni námskjarna, samruna reglugerða, bætta starfs- og námsráðgjöf í skólum og almennt meira valfrelsi í námi.
Í dag skiptist framhaldsskólinn í tvennt; bóknám sem endar með stúdentsprófi og starfsnám sem endar með atvinnuréttindum og/eða sveinsprófi en býður jafnframt upp á viðbótarnám. Nefndin leggur hinsvegar til að framhaldsskólinn verði heildstæðari, án aðgreiningar. Hún gerir ráð fyrir litlum kjarna, 27 eininga að lágmarki, og ótakmörkuðu vali á námsáföngum. Einnig vill hún auka tengsl milli grunnskóla, framhaldsskóla, háskóla og atvinnulífs.
Nýja framhaldsskólanum mun ýmist ljúka með sveinsprófi eða stúdentsprófi. Útskrifaðir nemendur geta þá farið beint í háskóla eða fagháskóla sem samsvarar framhaldsstarfssnámi eða einu til þremur árum í háskóla. Öllum verður frjálst að sækja sér eftirfarandi menntun aukalega; grunnnám og fagnám í háskóla, starfsnám í fagháskóla eða vinnustaðanám í samstarfi við atvinnu og skóla. Nemendur geta því með öðrum orðum ráðstafað námi sínu að vild og tekið sér þann tíma sem þeim hentar.
Þessi áform ættu að kæta námsmenn þessa lands, því að þessu sinni eru hagsmunir þeirra hafðir í huga, ólíkt fyrri hugmyndum um námsfyrirkomulag.