Hvar eru konurnar?
Nú er búið að skipa í ráð og nefndir borgarinnar. Því miður verð ég að segja að komi mér varla á óvart með þennan meirihluta hversu mikið hallar á konur. Alltaf heldur maður áfram að vona að jafnrétti náist í þessum málum. En ég er satt að segja búin að gefast upp á að bíða og vonast eftir að hlutirnir breytist.
Í borgarstjórn sitja sex konur af fimmtán borgarfulltrúum það eru 40%. Ef við skoðum fagráð borgarinnar er 41% þeirra sem þær skipa konur. En segir það alla söguna? Ef maður skoðar tölurnar nánar kemur í ljós að af borgarfulltrúum meirihlutans í fagráðum borgarinnar eru einungis 32%. Ef minnihlutinn er skoðaður kemur hins vegar í ljós að 52% þeirra fulltrúa eru konur. Merihlutinn svarar gagnrýni á hlut kvenna í borginni á þann veg að 41% aðal-og varamanna þeirra séu konur. Ég er ekki sátt við þau svör. Er það hlutverk kvenna í stjórn borgarinnar að sitja á ?varamannabekknum?. Hvers kyns jafnrétti er það eiginlega?
Borgin ætti að mínu mati að vera til fyrirmyndar í jafnréttismálum. Staða kvenna í borginni ætti að vera mun sterkari en hún er. Er ekki komið árið 2006? Hvað gerðist? Jafnrétti á pappírunum lítur alltaf vel út en hvar er það í raun? Er þetta ekki vísbending um að kvenfrelsisstefna Vinstri-grænna eigi fullt erindi í borgina? Núna er það á ábyrgð okkar sem tilheyra "ungu kynslóðinni" að breyta. Breyta áherslum í stjórn borgarinnar þannig að kvenfrelsi og aukin hlutur kvenna verði tryggður á okkar mannsaldri. Núna þarf meirihlutinn að láta verkin tala og mín krafa er: Kvenfrelsi núna!
Skrifa athugasemd