Ungt fólk á erindi í stjórnmál
Þegar ég ræði við jafnaldra mína um pólitík fæ ég oft þau svör að póltík sé gamalmennaiðja sem skipti unga litlu máli og stundum er ég spurð hvernig í ósköpunum ég nenni þessu dútli. Hvernig ég afberi langar fundasetur, lýjandi rökræður og æði mikla skriffinnsku. Neikvæð molla virðist ríkja yfir þessu gildishlaðna orði: "pólitík".
Hvers vegna ætti ungt fólk að verja tíma sínum í að sinna stjórnmálum, þegar svo margt annað er í boði og þeir eldri virðast reiðubúnir til slíkra nefndastarfa ?
Sjónarhorn ungra skiptir máli og rödd þeirra þarf að heyrast, því margar pólitískar ákvarðanir snúa beint að þeim. Stytting náms til stúdentsprófs, lánasjóðir, húsnæðismál, leigumál, leikskólamál, samgöngumál, íþrótta- og tómstundamál eru bara örfá dæmi um slíka málaflokka. Í raun snúa öll stjórnsýslumál að ungum, sem og öldnum.
Lýðræði er tímafrekt, en nauðsynlegt. Með því að hafa hugsjónir er hægt að bæta heiminn, leita lausna og láta gott af sér leiða. Allir geta verið virkir þjóðfélagsþegnar, haft áhrif og verið sýnilegir, ef viljinn er fyrir hendi.
Yngra fólk kemur inn sem ferskur blær inn í stjórnmálin með nýjar hugmyndir og framtíðarsýn. Það skilur hagsmuni ungra, getur talað þeirra máli og haft áhrif. Allir vilja hafa eitthvað um umhverfi sitt að segja. ?Ekki viljum við að aðrir stjórni lífi okkar ? Tökum þátt og mótum umhverfi okkar, nýtum okkur tækifærin . Við, sem ungt fólk, erum stjórnendur framtíðarinnar og eigum fullt erindi í stjórnmál.