Ísland er ekki land þitt
Til að manninum sé unnt að skilja heiminn þarf hann að einfalda hann. Til þess notar hann svokallaðar staðalmyndir, en jafnframt því að vera manninum ómissandi hjálpargagn ala þær einnig á fordómum. Það gefur auga leið að þeim mun smærri sem heimsmynd manna er, þeim mun meiri fordóma hafa þeir.
Hugtakið land er ein þessara staðalmynda. Öll lönd eiga sér sömu uppsprettu, úr heitum kvikustrókum iðra jarðarinnar, og öll eru þau eldri en maðurinn. En þegar maðurinn kom til sögunnar einfaldaði hann heimsmynd sína með því að aðgreina löndin eftir staðsetningu. Með tímanum skipti maðurinn sér í þjóðir eftir búsetu, og svo fór að lokum, að einhver þóttist eiga landið.
Líkt og löndin eiga allir menn sér sama uppruna. Um það leyti sem þróunin mótaði hann voru öll lönd eitt. Svo flutu þau eins og eftir geðþótta hvert í sína áttina, og aðgreindu mennina, með fyrrgreindum afleiðingum: Hjá þeim urðu staðalmyndirnar kveikjan að heimóttarskap.