Sannleikurinn um styttinguna
Orðanotkun skiptir oft öllu máli í stjórnmálum. Nú hefur mikið verið rætt að undanförnu um það sem hefur verið kallað stytting náms til stúdentsprófs. Hin svokallaða stytting er þó mun nær því að vera skerðing á námi til stúdentsprófs. Framhaldsskólinn verður í stuttu máli skertur um 20 einingar; 8 falla niður en 12 verða færðar niður í grunnskólann. Tilgangurinn er að framhaldsskólinn verði þrjú ár í stað fjögurra og ávinningurinn á að vera sá að hér útskrifist stúdentar jafngamlir og í nágrannalöndum okkar.
Nú er algjörlega óvíst hvaða tilgangi slík samræming þjónar og hvort hún skiptir einhverju máli. En ef maður vill samræma þá er margt annað sem þarf að líta til eins og t.d. upphaf grunnskólagöngu en í Evrópulöndum hefja börn grunnskólagöngu ýmist 5, 6 eða 7 ára. Ef það á að samræma af einhverju viti þarf að horfa heildstætt á kerfið.
Menntamálaráðuneytið og menntamálaráðherra telja reyndar að það sé til marks um hve heildstætt hafi verið horft á kerfið að 12 einingar hafi verið færðar niður í grunnskólann. Samkvæmt skýrslu ráðuneytisins hefur sú tilfærsla verið þannig undirbúin að ?það hefur verið eyrnarmerkt fjármagn í endurmenntun grunnskólakennara?
Þar gleymist að menntun framhaldsskólakennara er allt önnur en menntun grunnskólakennara. Þeir fyrrnefndu hafa að lágmarki þriggja ára fagnám að baki sem og eitt ár í uppeldis- og kennslufræði. Þeir síðarnefndu hafa oftast þriggja ára nám í kennslufræði að baki þar sem minnihluti námsins fer í faggreinarnar. Endurmenntun menntamálaráðherra mun ekki breyta þessum mun.