Olíufurstar rústa regnskógum
Þó að hryðjuverkin í Bandaríkjunum og stríðin gegn Afganistan og Írak hafi vakið hvað mesta athygli umheimsins á þeim tíma sem liðinn er síðan George Bush settist á forsetastól í Bandaríkjunum, hefur afstaða forsetans til umhverfismála einnig vakið nokkra athygli, þó alls ekki næga.
Þegar umræða hófst að einhverju marki um umhverfismál, mengun, gróðurhúsaáhrif og þynningu ósónlagsins á níunda áratugnum töldu margir að þessi málaflokkur væri eitthvað sem allir gætu sameinast um enda hagsmunir allra manna að varðveita jörðina sem lengst í íbúðarhæfu ástandi. En nýjustu fregnir að vestan benda til þess að svo sé ekki.
Bush hefur sem kunnugt er þráast við að staðfesta Kyoto-bókunina en henni var ætlað að sporna gegn gróðurhúsaáhrifum og hlýnandi veðurfari á jörðinni. Nýlega var sagt frá því í fréttum að Bush-stjórnin hefði í hyggju að heimila aukna notkun á skordýraeitri sem hefur ósóneyðandi áhrif og þjóðir heims höfðu sammælst um að hætta að nota í Montreal-sáttmálanum. Og nú berast enn fréttir af bandarískum stjórnvöldum sem bera vott um fullkomið virðingarleysi gagnvart umhverfinu og áhugaleysi um framtíð mannkyns.
Þannig er mál með vexti að Bush leitar nú að stuðningi við umdeild áform um að leggja eldneytisleiðslur frá regnskógunum á Amazón-svæðinu í Perú til strandarinnar. Það áhugaverða við áformin er að þau munu skila umtalsverðum fjármunum í vasa helstu manna og fyrirtækja sem styrkt hafa kosningasjóði Bush ríkulega. Hins vegar hafa umhverfisverndarsinnar bent á ýmis umhverfisspjöll sem þau hafi í för með sér, bæði fyrir regnskógana, dýralíf og mannabyggðir.
Á meðal þeirra sem standa að verkinu eru tvö orkufyrirtæki frá Texas sem tengjast Hvíta húsinu, Hunt Oil og Kellogg Brown & Root sem er dótturfyrirtæki fyrirtækis sem Dick Cheney stýrði áður, Haliburton, en það vinnur nú að endurskipulagningu olíuframleiðslu í Írak. Tveir sterkir fjárfestar, Citigroup og Overseas Private Investment Corporation, hafa þegar bakkað út úr verkinu þar sem þeir telja að umhverfisáhrifin geti orðið of mikil og framkvæmdin þ.a.l. of áhættusöm en áætlað er að leiðslan liggi í gegnum svæði sem hýsir eitt fjölbreyttasta lífríki jarðarinnar.
Svæðið er mjög afskekkt og er ósnortið. Þar af leiðandi hefur skapast mjög markvert vistkerfi. Á ströndinni má t.a.m. finna Humboldt-mörgæsir, sæljón og grænar sæskjaldbökur. Meðal hugsanlegra áhrifa leiðslunnar eru aurskriður, gróðureyðing og eyðing landsvæða þar sem frumbyggjar búa. Þá hafa umhverfissinnar varað við sótthættu en frumbyggjarnir eru afar viðkvæmir fyrir utanaðkomandi sýklum.
Verkið er þegar hafið en hefur gengið örðuglega sökum óvinsælda. Eigi að síður vinnur Bush-stjórnin nú að því að tryggja því fjárhagslegan grundvöll. Bush stendur hugsanlega í þakkarskuld við Ray Hunt, stjórnarformann Hunt Oil, en hann gaf meira en 100.000 dali í kosningasjóð Bush árið 2000. Áður hefur verið minnst á tengsl Kellogg Brown & Root við varaforseta Bandaríkjanna, Dick Cheney.
Verkið hefur vakið spurningar í bandaríska þinginu og Alþjóðaþróunarstofnun Bandaríkjanna hefur lýst andstöðu sinni við framkvæmdirnar sem muni valda óafturkræfum og umtalsverðum spjöllum á þessu einstaka lífríki. Á meðan má sjá dollaramerki í augum olíufurstanna sem virðast litlar áhyggjur hafa af framtíðinni svo lengi sem pyngjan er full.