Daufheyrst við hungri
Fundi átta ríkustu landa heims í Frakklandi lauk fyrir skömmu. Helsta niðurstaða fundarins - og það eina sem leiðtogarnir átta gátu komið sér saman um - var að hryðjuverkastarfsemi ógnaði stöðugleika í heiminum og berjast yrði gegn henni. Þá var og samþykkt ályktun um að þrýsta á Norður-Kóreu og Íran að hætta við áætlanir sínar í kjarnorkumálum. Minna fór fyrir því að leiðtogar þessara ríkustu landa heimsins ræddu um nauðsynlegar og réttlátar aðgerðir til að stemma stigu við fátækt í heiminum. Misskipting auðævanna er yfirleitt talið mesta vandamál heimsins.
Brasilía er eitt fátækasta ríki heims. Þetta er ótrúleg staðreynd, þar sem landið er jafnframt meðal hinna ríkustu. Allar auðlindir landsins eru aftur á móti í eigu fárra einstaklinga og stórfyrirtækja. Hinn almenni Brasilíubúi er hins vegar ólæs fátæklingur.
Þessu vill Luis Inacio Lula da Silva, forseti landsins, breyta. Da Silva var í hópi leiðtoga þróunarrríkja sem boðið var að vera við upphaf leiðtogafundarins. Hann kom til fundarins í Frakklandi og skoraði á leiðtoga ríkustu landa heims að stofna sjóð til að berjast gegn hungri í heiminum. Ekki væri hægt að bíða með aðgerðir gegn hungri. Da Silva segir að fé í hungursjóðinn megi fá með því að skattleggja alþjóðlega vopnasölu og með því að hlutfall af skuldagreiðslum þróunarlandanna renni til sjóðsins. Hann deilir þeim áhyggjum, með mörgum öðrum, að Heimsviðskiptastofnunin þráist við að leggja af niðurgreiðslur ríkari þjóða heims á landbúnaðrvörur. Þessar sömu niðurgreiðslur komi í veg fyrir að fátækustu þjóðir heims geti flutt út eigin landbúnaðarafurðir.
Þetta hefur margvíslegar afleiðingar í för með sér. Bændur í þróunarlöndunum eru oftar en ekki fastir í því að rækta eina tegund fyrir erlenda auðhringa. Ótölulegur fjöldi bláfátækra kaffibænda í Mið- og Suður-Ameríku er dæmi um það. Erfitt, ef ekki ómögulegt, er fyrir þessa bændur að auka fjöldbreytni í ræktun og selja afurðirnar. Fyrirtækin vilja ekki kaupa. Svo eru aftur þeir bændur sem fá meira fyrir að rækta kókalauf eða valmúa en að rækta matvæli.
Þess vegna er nauðsynlegt að veita fátækari ríkjum heims mikla aðstoð. Mörg ríkjanna glíma enn við afleiðingar nýlendustefnu stórveldanna. Og á meðan ekkert verður að gert, munu þau glíma við þennan fortíðarvanda um alla framtíð. Því miður hafa leiðtogar ríkustu landa heims ekki áhuga á því að breyta þeirri stöðu.
Rót alþjóðlegra hryðjuverka er ekki síst að finna í misskiptingu auðs í heiminum. Það segir sig líka sjálft að hryðjuverk verða ekki upprætt með því að ráðast á fullvalda ríki, drepa borgara þess og ræna auðlindum. Til lengri tíma litið verða hryðjuverk einungis upprætt með því að jafna kjör fólks um allan heim, og að þessi ríkustu lönd heimsins, einkum Bandaríkin, láti af heimsvaldastefnu. Ekki komu leiðtogar voldugustu ríkja heims auga á það, því miður.