Róttækari aðgerðir í umhverfismálum
Stjórn UVGH ályktar um umhverfismál
Stjórn Ungra vinstri grænna á höfuðborgarsvæðinu vill vekja athygli á umsókn borgarstjórnar til tilnefningar Reykjavíkur sem Græna borg Evrópu (e. European green capital). Umsóknin gefur í skyn að Reykjavík hafi náð framúrskarandi árangri í umhverfisvernd. Stjórn UVGH telur þó að enn sé mjög langt í land.
Í stjórnartíð núverandi meirihluta hefur umhverfisvernd verið hunsuð og allri umræðu verið ábótavant. Lítið aðgengi er að endurvinnslu, skammsýni ríkir í orkumálum og almenningssamgöngur eru í lamasessi.
Enn er tækifæri til breytinga og mun stjórn Ungra vinstri grænna á höfuðborgarsvæðinu fagna því ef meirihlutinn tekur umsókninni sem hvatningu til töluvert róttækari aðgerða.
Greinargerð: Ung vinstri græn á höfuðborgarsvæðinu vilja leggja eftirfarandi tillögur fram til náttúruverndar innan sem utan borgarmarkanna:
1. Endurvinnsla á höfuðborgarsvæðinu er með öllu óásættanleg. Endurvinnslustöðvar eru of fáar og of stórar. Nær væri að boðið væri upp á minni einingar sem allra víðast. Staðan í dag er slík að ómögulegt er að fara í Sorpu nema á einkabílnum. Það er ekki möguleiki að rogast með þunga poka af blöðum, flöskum og öðru tilfallandi til endurvinnslu langar leiðir. Ef endurvinnslan á að skila árangri stingur það í stúf að neyðast til að nota einkabílinn og menga þar með andrúmsloftið á leið sinni til endurvinnslunnar.
Ung vinstri græn á höfuðborgarsvæðinu vilja því leggja til að fé sé ráðstafað til að koma upp smáum einingum, gámum og öðru slíku, á sem flesta staði í hverju hverfi. Smáhýsi utan um gámana eru raunhæfur kostur til að forðast óþef frá þeim og koma í veg fyrir að ásýnd hverfisins verði verri.
Þessi einfalda lausn myndi minnka álagið á Sorpu umtalsvert, gera endurvinnslu aðgengilegri og virkja fólk til að vera umhverfisvænt. Vissulega væri einhver kostnaður við framkvæmdina en Stjórn Ungra vinstri grænna á höfuðborgarsvæðinu telur að það sé lítið verð fyrir bætt umhverfi og náttúruvernd.
2. Skammsýni í orkumálum hefur einkennt ákvarðanir meirihlutans í borgarstjórn og sjaldan verið jafn mikið í deiglunni og síðustu mánuði. Meðferð mála sýnir enn og aftur að ´hægri´ og ´grænt´ fara ekki saman. Græðgin virðist vera skynseminni yfirsterkari og nýtir sér verkfæri stóriðjunnar, jarðýtuna, til að ryðja öllum æskilegum hindrunum úr vegi. Stjórn Ungra vinstri grænna á höfuðborgarsvæðinu hefur aldrei verið sérlega hrifin af núverandi meirihluta en missti nær andlitið þegar ákvörðun um sölu hluta HS-Orku til Magma Energy var tekin. Stjórnin biðlar til meirihlutans í borgarstjórn til að nota höfuðið þegar taka þarf stórar ákvarðanir sem geta haft alvarlegar afleiðingar í för með sér.
3. Skipulag samgangna í borginni er ábótavant. Lítil áhersla er lögð á bættar almenningssamgöngur og sífelldar breytingar til hins verra gera einkabílinn að nær eina kosti fólks. Strætóferðir þurfa að vera tíðari og áreiðanlegri, sú krafa er svo sem ekki ný en er hér ítrekuð. Almenningssamgöngur eru góðar í öllum nágrannaþjóðum.
Lítiðer gert ráð fyrir reiðhjólafólki í Reykjavík. Reiðhjól eru álitin kostur til útivistar yfir hásumarið en ekki raunhæft samgöngutæki. Þrátt fyrir slæmt veðurfar hér er ekki ómögulegt að nýta þau að vetri til með almennilegum ruðningi gangstétta. Reykjavíkurborg ætti einnig að hafa í huga að upphitaðir hjólreiðastígar meðfram helstu götum borgarinnar, að skandínavískri fyrirmynd, er sniðugur og umhverfisvænn kostur.
4. Stjórn Ungra vinstri grænna á höfuðborgarsvæðinu vill einnig ráðast í stærri og áhrifameiri breytingar til handa bættu samgöngukerfi og betri borg. Stjórnin leggur til að sveitarfélögum á höfuðborgarsvæðinu verði fækkað umtalsvert. Það er merki um úrelt skipulag að höfuðborgarsvæðið nái yfir 8 sveitarfélög; Reykjavík, Kópavog, Garðabæ, Seltjarnarnes, Hafnarfjörð, Álftanes, Mosfellsbæ og Kjósarhrepp. Breytingin hefði í för með sér betri samgöngur og öflugra kerfi með sameiginlegu útsvari.
Stjórn Ungra vinstri grænna á höfuðborgarsvæðinu leggur einnig til að umferðasektir og stöðusektir séu tekjubundnar. Þrepaskipt sektakerfi er bæði sanngjörn og góð leið til að afla meiri tekna til samgangna og bæta umferðarkerfið. Hækkun umferðasekta á þá efnameiri hefði líka vonandi í för með sér varkárni og löghlýðni landans.
Niðurstaða stjórnarinnar er sú að Reykjavík eigi ekki skilið að vera Græna borg Evrópu eins og staðan er í dag. Vilji til að gera betur og framkvæmdagleði í þágu náttúruverndar þarf að stóraukast sem og frumlegheit í lausnum. Stjórnin fagnar Grænu skrefunum sem Reykjavíkurborg lagði til á sínum tíma og hefur farið eftir að einhverjum hluta, þó bera Grænu skrefin þess merki að meirihlutinn telji vandann minni en hann er í raun og veru. Stjórn Ungra vinstri grænna á höfuðborgarsvæðinu vill sjá töluvert róttækari aðgerðir til að bæta umhverfi borgarbúa og andrúmsloft áður en farið er í umsókn til verðlauna sem við eigum svo bersýnilega ekki skilið að hljóta.